ಕವಿಸಮಯಸಾಹಿತ್ಯ

ಇವಳೇ ಹೆಣ್ಣು…

DEEPAK KORADI– ದೀಪಕ್ ಕೋರಡಿ

ಕಣ್ ಬಿಡುವ ಮುನ್ನವೇ
ಎದೆಗಪ್ಪಿಕೊಂಡಳು,
ಮಮತೆಯ ಬೆರೆಸಿದ
ಅಮೃತವನೆರೆದಳು,
ಅಂದಿನಿಂದ ಇಂದಿಗೂ
ಪೊರೆಯುತಲೇ ಇಹಳು – ಅಮ್ಮ..

ಹಣ್ಣುಗೂದಲ ಹೊತ್ತು
ಸವಿಮಾತ ನುಡಿವಳು,
ಕಥೆಗಳ ಪಲ್ಲಂಗದಲಿ
ಸುಖನಿದ್ರೆ ತರಿಸುವಳು,
ಪೆಟ್ಟುತಿಂದು ಅತ್ತಾಗ
ಓಡೋಡಿಬರುವಳು – ಅಜ್ಜಿ..

ಸುರಿಮಳೆಯಲಿ ತಾ ನೆಂದು
ನನ್ನ ರಕ್ಷಿಸುತ್ತಿದ್ದಳು,
ಬುತ್ತಿಯನ್ನು ಶಾಲೆತನಕ
ಹೊತ್ತು ತರುತ್ತಿದ್ದಳು,
ಅಂಗಳದಲ್ಲಿ ಆಡುವಾಗ
ಅಕ್ಕರೆಯ ಹಂಚುತಿದ್ದಳು – ಅಕ್ಕ..

ನನ್ನೆಲ್ಲಾ ಭಾವನೆಗಳಿಗೆ
ಬುನಾದಿಯಾಗಿ ನಿಂತಿಹಳು,
ನಾ ಕಾಣುವ ಕನಸನೆಲ್ಲಾ
ಮಕ್ಕಳಂತೆ ಸಾಕುತಿಹಳು,
ಒಂಟಿತನವು ಕಾಡುವಾಗ
ಮರುಜೀವ ತುಂಬುವಳು – ಮಡದಿ..

ಕತ್ತಲ ಹಾದಿ ಹಿಡಿದಾಗ
ದಾರಿದೀಪ ತೋರುವಳು,
ದುಗುಡವನ್ನು ದೂಡುವಲ್ಲಿ
ಸಹಾಯಹಸ್ತ ನೀಡುವಳು,
ನೋವು-ನಲಿವಲಿ ಜೊತೆಯಾಗಿ
ನೆರಳಂತೆ ನಿಲ್ಲುವಳು – ಗೆಳತಿ..

(12-3-2012)

Related Articles

Back to top button

Looks like your ad blocker is on.

We rely on ads to bring you our intuitive articles & journalism. Please allow ads & support KannadaTimes.com.